Исследование крови на ВИЧ в Бишкеке

Изилдөөгө көрсөтмөлөр: АИВ-инфекциясына шектенүү; кош бойлуулукту пландаштыруу жана ага даярдык; операция алдындагы даярдык; байма-бай кайталануучу инфекциялык оорулар (герпес-вирустук инфекция; ички органдардын кандидозу; микоплазмалар, пневмоциста же легионеллалар козгогон пневмония) же алардын айкалышы; Капоши саркомасы; кокусунан болгон жыныстык катнаштар; кан куюуга даярдык; жуктуруп алуунун жогорку тобокелдиги (эгер бейтап стерилденбеген шприцти колдонуп, инъекциялык жол менен баңгизат колдонсо; жаңы инфекцияланган кан камтылган шприц же башка медициналык аспап менен кокусунан жаракат алса).

АИВ организмге түшкөндө, ал иммундук системанын клеткаларынын ичине кирет. Инфекцияланган клеткалардын үстүндө вирустун структуралык белогу — р24 антигени пайда болот. Аны инфекция жуккандан 2–4 жума өткөндөн кийин канда аныктоого болот.

Мындан тышкары, вируска иммундук система реакция кылат. Ал спецификалык коргоочу белокторду — антителолорду иштеп чыгарат. Вирустун ар кандай типтерине ар кандай антителолор синтезделет. Тест-система кандагы антителолорду аныктай алышы үчүн, вирус организмде бир канча убакыт болушу керек, ошондуктан антителолорго анализ адамдын инфекция жуктуруп алган-албаганын инфекция жуккандан 3–12 жума өткөндөн кийин гана көрсөтөт. Сейрек учурларда антителолор кечирээк иштелип чыгат, жана тест-система аларды канда инфекция жуккандан жарым жыл өткөндөн эрте эмес аныктайт.

Скринингдик изилдөөнүн жүрүшүндө канда биринчи жана экинчи типтеги АИВке каршы антителолор, ошондой эле алардын жалпы антигени — р24 аныкталат.

АИВке каршы антигенди да, антителолорду да аныктоонун аркасында, анализ АИВ-инфекциясын дээрлик бардык стадиясында аныктоого мүмкүндүк берет.

Анализдин оң жыйынтыгы — бул акыркы диагноз эмес. Жалган-оң же жалган-терс жыйынтыктарды жокко чыгаруу үчүн, дарыгер бейтапка кошумча тастыктоочу изилдөөлөрдү дайындашы мүмкүн.

Жалган-оң жыйынтыктын мүмкүн болгон себептери:

Эпштейн — Барр вирусу (IV типтеги герпес вирусу) козгогон инфекция; иммуноглобулиндерди (курамында антителолордун жогорку титри бар препараттар) кабыл алуу; гипербилирубинемия — кандагы билирубиндин деңгээлинин жогорулашы (көбүнчө боордогу жана өт чыгаруучу жолдордогу сезгенүүлөрдүн же инфекциялардын фонунда); аутоиммундук оорулар (иммунитеттин ишинин бузулушу — организмдин өз клеткаларынын бузулушу). Жалган-терс жыйынтыктын мүмкүн болгон себептери:

инфекциянын алгачкы стадиясы (жуккан учурдан баштап алгачкы 2 жума). Анализди 1–3 жумадан кийин кайра тапшыруу сунушталат; инфекциянын серонегативдүү варианты, башкача айтканда, антителолор инфекциянын кечки мөөнөтүндө иштелип чыгат. Анализди 1–3 жумадан кийин кайра тапшыруу сунушталат; терминалдык стадия — ЖИКС (СПИД). АИВке анализдин жыйынтыгы так эмес (белгисиз) чыккан учурда, биоматериал тастыктоочу изилдөө үчүн референс-лабораторияга жөнөтүлөт. Бул учурда анализди аткаруу мөөнөтү 14 күнгө чейин узартылышы мүмкүн.